Kreu i PD-së Lulzim Basha mbrëmjen e sotme përgjatë një deklarate mediatike në selinë blu theksoi se qeveria e kryeministrit Edi Rama ka formuar një aleancë të ngushtë me bandat dhe me krimin për të vjedhur zgjedhjet.
Basha teksa përmendi emra konkretë, tha se shteti u ka dhënë Avdylajve mundësinë që të përdorin dhe pastrojnë paratë e krimit duke ju dhënë leje ndërtimi:
“Shteti u dha Avdylajve edhe mundësinë të përdorin dhe pastrojnë paratë e krimit duke ju dhënë leje ndërtimi dhe leje të tjera, direkt apo indirekt në emër të tyre. Mbi katër leje ndërtimi ka marrë banda e Avdylajve nga Vangjush Dako.
E njëjta gjë në Peshkopi. Imer Lalës dhe të tjerëve shteti u dha licencën të kultivonin dhe trafikonin drogën. Madje policia direkt u ka afruar këtë pazar kriminelëve: na ndihmoni të vjedhim vota dhe jeni të lirë të mbillni kudo kanabis.
Vjedhja e votave ka çuar në kapjen e shtetit dhe të ekonomisë nga krimi. Trafikantët e drogës sot financojnë direkt apo indirekt kompani ndërtimi, projekte zhvillimore, kompani minerare, kompani transporti, televizione, koncesione publike, punë publike, janë në naftë në minerale ne resorte turistike dhe në zhvillimin e pronave.
Jo pak biznese tani kanë bërë aleanca me kriminelët për menaxhimin dhe mbrojtjen e bizneseve të tyre sepse krimineli u ofron atyre edhe forcën e dhunës, edhe mbrojtjen e shtetit.
Prandaj, hetimi i vjedhjes së zgjedhjeve nuk do jetë kurrë i plotë pa hetuar në thellësi bashkëpunimin ekonomik të krimit me shtetin, si shpërblim për vjedhjen e votave. Drejtësia nuk mund të bëhet pa zbuluar të gjithë shtrirjen e konspiracionit krim-qeveri”.
