Kryetari i Partisë Demokratike, Lulzim Basha ka mbledhur në selinë blu, 153 kandidatët për deputetë për të kryer analizën e zgjedhjeve të 25 prillit.
Mësohet se gjatë fjalës së tij, Basha ka falenderuar të gjithë kandidatët për punën e bërë për arritjen e demokracisë në vend.
Basha është shprehur se edhe pse zgjedhjet u vodhën, 25 prilli shënoi një arritje të madhe për PD-në dhe Shqipërinë.
Kryedemokrati ka ripërëritur faktin se beteja e tyre do të vazhdojë deri në fitore, dhe shtoi se do të takojë personalisht njerëzit në terren.
Lulzim Basha: ”Dua të falenderoj secilin nga ju. Ju keni punuar shumë fort me besimin e palëkundur në rrugën tonë, në demokracinë tonë, në vendin tonë. Pavarësisht vjedhjes më të madhe të votave në historinë e Shqipërisë të kryer nga Rama-Doshi, ne sollëm një arritje të madhe për partinë tonë dhe për vendin tonë. Ne, pa hequr dorë nga vlerat tona, u bëmë më të fortë kudo. Tani do të luftojmë me të gjitha fuqinë tonë derisa në fitore. Fushata jonë nuk ka mbaruar, ajo vazhdon me energji maksimale. Unë do takoj njerëzit në terren, për t’i falënderuar, për të biseduar me ta, për t’i dëgjuar, duke ju kërkoj që edhe ju të bëni të njëjtën gjë në ditët në vijim. Së bashku do të fitojmë.”
Ndërkohë, pak më parë Komisioni Qendror i Zgjedhjeve(KQZ), ka certifikuar zgjedhjet parlamentare si dhe fitoren e Partisë Socialiste që mori 74 mandate.
Nga sot, secila parti ka 5 ditë afat të bëjë ankimim zyrtar në Komisionin e Ankesave dhe Sanksioneve (KAS) nëse kanë pretendime për rezultatin, apo kërkesa për rinumërim.
Pasi KAS të shqyrtojë të gjitha ankesat dhe të dalin vendimet nga Kolegji Zgjedhor, kryekomisioneri Ilirjan Celibashi do të shpërndajë mandatet me emrat e deputetëve të rinj.
