Sekretarja e re për të Përndjekurit në PD, Jonila Godole, ka kërkuar dje distancimin e PD-së nga ish-kryeministri Berisha. Godole u fut në parti nga kryedemokrati Basha. Godole tha se çdo forcë politike e tregon pjekurinë e saj pikërisht në këto vështirësi. Sipas saj, kjo është pjesa ku PD-ja e tregon se është vërtet një parti që meriton të vijë në pushtet.
Godole në deklaratën e parë të bërë publike, ka kërkuar distancimin e PD-së nga Berisha dhe largimin e tij nga PD-ja. Në një intervistë, e pyetur për largimin e Berishës, Godole tha se edhe ai duhet të largohet dhe se PD-ja duhet të tregojë se është vërtet një parti që e meriton të vijë në pushtet.
“Vendimi i z. Berisha është vendim personal i tij. Çdo forcë politike tregon pjekurinë e vet pikërisht në këto lloj momentesh të rëndësishme. Kjo do ta çojë PD-në përpara ose jo, këto janë kosto që do t’i mbajnë ata. Unë kam thënë që bota ka treguar që dhe personalitete të mëdha, të cilët kanë qenë absolutisht të rëndësishëm për gjithë Evropën, ku kam sjellë në vëmendje rastin e ish-kancelarit gjerman Helmut Kohl, në një moment të caktuar partisë i është dashur të marrë një vendim, që të ndahej prej tij, por duke respektuar kontributin e tij deri në fund. Këto janë vendime që i marrin partitë vetë. Këto janë modele që unë i kam sugjeruar. Nëse mua do më pyesin sot nga brenda PD-së, patjetër që do ta sugjeroj këtë dhe do flas hapur. Por kjo është pjesë e PD-së, duhet të tregojë se është vërtet një parti që e meriton të vijë në pushtet. Unë shpresoj shumë që PD-ja të bëjë zgjidhjen e tyre”, tha Godole.
Këto janë provat se ish-kryeministri Sali Berisha rrezikon të përjashtohet nga Partia Demokratike. Edhe pse ka filluar të rrisë presionet ndaj Bashës, ky i fundit po jep sinjale se PD-ja mund të distancohet nga ish-lideri i saj, para seancës së parë parlamentare.
