Kreu i Partisë Demokratike, Lulzim Basha ndodhet në qytetin e Korçës, ku po mban një takim me qytetarë.
Gjatë fjalës së tij, Basha iu referua arrestimit të Klevis Balliut, ndërsa dha mesazhin se ish-deputeti nuk ka qenë kurrë më i vendosur dhe nuk ka qeli që e tremb.
Kryedemokrati tha se fundi i Rilindjes po afron, teksa shtoi se PD dhe opozita nuk kërcënohen nga një “kufomë politike”.
Fjala e Bashës:
Krimi i vetëm i Klevis Balliut ishte se qëndroi në krah të popullit kur u dhunua. Mesazhi i qartë i Edi Ramës është se unë nuk pyes, unë i çoj në prokurori, siç bëri me Salianjin. Kur do ia merr frymën qytetarit, studentit, ia prish shtëpinë qytetarit.
Klevis Balliu nuk ka qenë kurrë më i vendosur, nuk ka qeli burgu dhe Edi Ramë ta trembë. PD dhe opozita nuk kërcënohen nga një kufomë politike që i ka orët e numëruar. Fundi i organizatës kriminale të Rilindjes, po afron dhe ne jemi më të vendosur për të kthyer betejën tonë drejt fitores.
Në këto 11 javë ka qenë qëndresa, bashkimi, përballja e shqiptarëve me këtë klikë kriminale që ka rrokulluar përmbys fatin e kriminelëve dhe ka treguar se Shqipëria do të ketë një të ardhme, e cila nuk do i takojë krimit të organizuar, por qytetarëve të ndershëm.
Orët e këtij regjimi po numërohen mbrapsht, protesta e 11 majit do jetë më e madhja në histori.
