Kryetari i Partisë Demokratike, Lulzim Basha ka vijuar takimet e tij me biznesin, teksa sot u ndal te një mobileri në Fushë-Krujë.
Basha u tha sipërmarrësve se duhet një ndërhyrje e fuqishme, pasi mbi 100 mijë persona kanë humbur vendet e punës për shkak të pandemisë.
Kryeopozitari tha se për këto persona, duhet një pagesë prej 160 mijë lekë në muaj, për 6 muajt e ardhshëm.
Ndërsa për punëdhënësit, Basha propozon shumën 200 mijë lekë, në mënyrë që të marrin përsëri njerëz në punë nëse kanë nevojë.
”Këtu duhet një mbështetje e fuqishme e menjëhershme, në radhë të parë për ata që kanë humbur vendet e punës. Mbi 100 mijë njerëz e kanë humbur vendin e punës, sepse pronarët, sipërmarrësit, nuk kanë qenë në gjendje t’i paguajnë. Për këta duhet të ketë një pagesë minimale. Sepse ata realisht janë me duart lart me sytë nga qielli, po janë familjarët, kryefamiljarë, kanë fëmijët për të ushqyer.
Ndaj një pagesë 160 mijë lekë në muaj, duhet rezervuar për ta, së paku për gjashtë muajt e ardhshëm. Për ata që i kanë hequr nga puna, por kanë nevojë t’i rimarrin, edhe ata kanë nevojë për një mbështetje të drejtpërdrejtë nga shteti prej 200 mijë lekësh. Këto janë për situatën aktuale’’, u shpreh Basha.
