Basha në Elbasan: Votoni për paqen dhe qetësinë

Kryetari i Partisë Demokratike, Lulzim Basha përmbylli fushatën elektorale në qytetin e Elbasanit.

Gjatë fjalës së tij, Basha u bëri thirrje qytetarëve që të votojnë për qetësinë e familjeve dhe paqen në zemrat e prindërve të tyre.

Basha u shpreh se me 25 prill, Elbasani dhe e gjithë Shqipëria do të votojë Partinë Demokratike për ndryshim.

Lulzim Basha: ”Më 25 prill, elbasanasit do të votojnë për qetësinë e familjeve të tyre, për paqen në zemrat e prindërve, për sigurinë e fëmijëve të tyre, për punësimin e nënave dhe baballarëve dhe për ta kthyer Elbasanin dhe universitetin e tij në një model arsimi për rininë. Kam nderin dhe kënaqësinë, dhe ju mundësinë, të çoni drejt parlamentit mazhorancën fituese të PD, ekipin tonë të mrekullueshëm, shkrimtarë, profesorë, mjekë, juristë, ekonomistë, sipërmarrës, të drejtuar nga Sekretari i Përgjithshëm i PD, Gazment Bardhi.

Dielli i fitores rrëzëllit në sytë tuaj, nata e të keqes bie për herë të fundit këtë të diel, sepse Elbasani do të marrë në dorë fatin e vet, të familjeve të veta. Vëllezër dhe motra ëndrrat tuaja dhe ëndrrat e mia për Elbasanin nuk kanë mbaruar. Ëndrrat e mia, ëndrrat tona, për Elbasanin nuk kanë mbaruar, më 25 prill le të fillojë punën me votën tuaj për të bërë realitet këto ëndrra, për të vazhduar projektet, për të çliruar familjet, sipërmarrjet, fermerët, mjekët, mësuesit dhe rininë, dhe për t’i dhënë mundësinë për zhvillim, punësim, pensione dinjitoze, për të rikthyer modelin e vyer e të çmuar, që na bënë të gjithë krenarë, qytetarinë. Do ta bëjmë realitet, sepse të dielën e gjithë Shqipëria dhe zemra e saj, Elbasani, do të votojnë masivisht për numrin 9, për të ardhmen e tyre, për prindërit e tyre, për paqe, siguri dhe zhvillim ekonomik, për Shqipërinë anëtare të BE.”