Kryetari i PD-së Lulzim Basha ditën e sotme ka parë nga afër gjendjen e bizneseve në Njësinë Nr. 1 në Tiranë.
Basha theksoi se në dyqane ka rënie të tmerrshme të xhiros.
Kreu i opozitës pohoi se kryeministri Edi Rama “ka propagandë, gënjeshtra, mashtrime, gjurmon si hajdut dhe spiun bizneset dhe i intimidon se thonë të vërtetën”.
Ndër të tjera Basha i mëshoi faktit se ai do e çlirojë Shqipërinë nga makthi.
“Inspektorëve, tatimorëve që edhe në këto kohë e kanë mendjen të gjobisin bizneset e vogla shqiptare i bëj thirrje të ndalen.
Në dyqane ka rënie të tmerrshme të xhiros, ka nga ata që më tregojnë se e mbyllin gjithë ditën pa asnjë klient.
Kjo është gjendja e 70% të sipërmarrjes në Shqipëri. Ka rënie totale të fuqisë blerëse, njerëzit nuk kanë lekë të blejnë ushqimet e përditshme. Kjo qeveri dhe ky kryeministër treguan se edhe në kohë krize nuk kanë pasur njerëzit e thjeshtë dhe sipërmarrjen, por oligarkët.
Kjo është skandaloze dhe kriminale, aq sa qytetarëve, aq iu kanë dhënë edhe oligarkëve nga buxheti i shtetit. Kryeministri ka propagandë, gënjeshtra, mashtrime, gjurmon si hajdut dhe spiun bizneset, i intimidon se thonë të vërtetën.
Kjo nuk është sjellja e një kryeministri. Ne do ta çlirojmë Shqipërinë nga ky makth i gjatë.
Buxheti dhe taksat duhet të shkojnë te shqiptarët, te nxitja e konsumit. Qeveria nuk mund t’ju japë lëmoshë, por duhet t’i dëmshpërblejë, duhet ndryshim i thellë. Ne kemi program që ndihmon njerëzit, do ndihmojë biznesin prodhues e sipërmarrjen”, u shpreh ai.
