Kreu i PD-së, Lulzim Basha, nuk ka të ndalur akuzat ndaj Berishës dhe Metës. Kryedemokrati Basha ka akuzuar Sali Berishën dhe Ilir Metën, se po bashkëpunojnë me kryeministrin Edi Rama. Gjatë një takimi me strukturat e degës 4 të PD në Tiranë, Basha tha se Meta do të marrë vota me dorën e Berishës, për t’ia çuar Ramës.
“Kur dolën listat e patronazhistëve, u kuptua që çdo shtyllë ka rënë. Mund të rrimë të heshtur, duke mos u futur në betejë. Mund ta lëmë Ilir Metën që me dorën e Sali Berishës të marri prap vota demokratësh, dhe t’i çojë prapë te Edi Rama.
O me demokratët dhe për demokratët, ose me Ilir Metën për Ramën. Shikoni si bëhen bashkë ku i cenohen interesat. Në vitin 2018, Berisha dhe Meta firmosën dhe sot janë kundër Vettingut. E kanë bërë malin e akuzave lundër meje më të lartë se mali i Dajtit. Unë u them merri akuzat ndaj meje, dhe çojini në SPAK. Atje të bëhet Vettingu i politikanëve, të bëhet Vettingu pasurisë së familjeve të çdokujt.
Thonë jo, se duan të bëjnë shpifje. Të tre i bashkon frika ndaj të vërtetës. Duan të fshehin qeverisjen më të korruptuar dhe më të dështuar që ka patur ky vend, dhe kjo propagandë mundohet të fshehë faktin se Edi Rama, Sali berisha dhe Ilri Meta janë bërë bashkë për të shkatërruar PD”, tha Basha.
Meta dhe Berisha e kanë deklaruar hapur se janë bërë pjesë e një fronti të përbashkët kundër amerikanëve. Dje presidenti dha detaje nga takimi mes tyre, i cili është mbajtur në Pallatin e Brigadave, ndërkohë që Berisha e mori në mbrojtje për çështjen e shkarkimit.
Presidenti ishte i ftuar dje në “News 24”, ku u pyet për vendimin e DASH kundër Berishës. Ai i doli në mbrojtje ish-kryeministrit, duke sulmuar amerikanët. “Nuk i lëviz asgjë atyre që kam thënë, koha Berisha po të ishte i korruptuar nuk dilte të mbronte veten. Nuk do mërzitesha nëse SHBA do shpallte non-grata Kryemadhin që dogji mandatin. Por si President i Republikës, të shpallet non-grata zonja e nderuar Liri Berisha e cila i ka shërbyer njerëzve, edhe sot që është në pension u shërben fëmijëve me probleme të autizmit. Kjo për mua është e papranueshme, por ata kanë marrë këtë vendim. Gjithçka që kërkon t’i shërbejë propagandës së një qeverie që synon asgjësimin e opozitës është e papranueshme. Të pranoj unë nga zonja Bilali dhe krushku i Muzinit të bëjnë moral, kjo është e papranueshme”, tha ai.
Nga ana tjetër, Meta e pranoi se do të tentojë të marrë frenat e opozitës. Ai u shpreh se në zgjedhjet vendore të vitit që vjen, do jetë në garë. Po ashtu dha detaje nga takimi me Berishën. “Takimi me Berishën e kërkova unë, për t’u çmallur. Takimi zgjati rreth 30 minuta, në mes të ditës, në mes të Gardës, në Pallatin e Brigadave”, u shpreh Meta.
