Kryetari i Partisë Demokratike, Lulzim Basha po flet mes protestuesve ku ka thënë se largimi i Ramës është i afërt dhe se në protestë nuk janë bashkuar vetëm hallet, por edhe lindja e një shprese të re.
Sipas Bashës, fati i kryeministrit është ky: do dalë para drejtësisë, ose do kërkojë azil politik.
“Nuk ka tel me gjemba që e mban vrullin popullor për ndryshim, ndryshimi ka nisur”, tha ndër të tjera kryedemokrati.
Fjala e Bashës:
Pas radhëve të policisë ndodhet banda më e keqe që ka parë Evropa, kryesuar nga Maduro i Ballkanit, Edi Rama.
Për 6 vite, kjo bandë vodhi dhe varfëroi shqiptarët, i gjobiti dhe i rriti çmimet. 6 vite me radhë, rriti taksat, rriti energjinë, çoi drejt vetëvrasjes disa kryefamiljarë, rriti çmimin e ujit, rriti çmimin e naftës, i nxori njerëz në mes të rrugës, qindra mijëra i çoi drejt rrugëve të kurbetit. Arma e tij gjatë këtyre viteve ka qenë mashtrimi, ka qenë propaganda e ndyrë që e bënte narkotrafikantin kryebashkiak, përdhunuesin hero, si një amanet nga babai i tij politik Enver Hoxha. Unë e di që gjithsecili prej jush këtu ka ardhur me vendosmërinë për t’i dhënë fund regjimit të Edi Ramës dhe për ta përcjellë para drejtësisë ose para azilit politik. Këtu janë bashkuar hallet e panumërta të shqiptarëve. Këtu janë bashkuar edhe shpresa dhe zgjidhjet për të nesërmen që po vjen! Studentëve dua t’ju them që ai që ju mashtroi është tashmë i larguar. Një ditë e re e universiteteve evropiane, po agon për ju! Nuk ka tel me gjemba që e mban vrullin popullor për ndryshim, ndryshimi ka nisur. Rama ik!/ Tirana Today
