Ish-lideri historik i PD-së, Sali Berisha, është përjashtuar përgjithmonë nga kjo forcë politike. 28 anëtarët e tjerë të Komisionit të Rithemelimit të kësaj force politike, që i dolën kundër kryedemokratit Basha dhe strukturave të tjera të partisë, po ashtu janë lënë jashtë strukturave të partisë blu.
Vendimet në fjalë janë marrë gjatë mbledhjes së Kryesisë që u zhvillua ditën e djeshme në orën 18:00 brenda në selinë blu, nën drejtimin e Lulzim Bashës.
Mbledhja filloi në orët e vona të mbrëmjes së djeshme dhe ka mbaruar në orët e para të mëngjesit të sotëm. Me urdhër të kryetarit Lulzim Basha, të gjithë anëtarëve të Kryesisë u janë mbledhur celularët, që të mos dilnin informacione në media dhe diskutimet kanë vijuar normalisht.
Pas protestës së 8 janarit dhe aktet e dhunshme që ajo solli, në selinë e Partisë Demokratike dje nisi pastrimi i saj. Punonjësit e pastrimit kanë pastruar godinën cep më cep për të zhdukur çdo gjurmë që la protesta e 8 janarit.
Edhe pas këtyre trazirave, disa të rinj mbështetës të Berishës shkuan përsëri në selinë e Partisë Demokratike, por prapë janë hasur me dyert mbyllur të zyrave të FRPD. Ata kanë vijuar me akuzat ndaj kreut demokrat Lulzim Basha, teksa një prej përfaqësuesve është shprehur se është tragjike kthimi i PD në këtë gjendje. Teksa e kanë quajtur Bashën peng të kryeministrit Edi Rama, të rinjtë shprehen se lideri e ka kthyer selinë në një bunker.
