Pas takimit të mbajtur me aleatët në selinë blu, kreu demokrat Basha tha se nuk do të ndalen, dhe se aksioni do të vazhdojë deri në largimin e Ramës nga pushteti.
Duke ftuar të gjithë qytetarët në orën 10:00 për një protestë masive, kryedemokrati tha se të gjithë politikanët e përfshirë me kokat e organizuara, do të shkojnë para drejtësisë.
“Opozita me qytetarët e bashkuar do të vazhdojnë aksionin ndaj kësaj qeverie të kapur në flagrancë, e kapur me krimin e organizuar”, tha ndër të tjera Basha. Referuar masave të policisë, ai hodhi akuza mbi qeverinë, duke e cilësuar si një regjim ushtarak.
Basha u shpreh se veç dosjes ‘339’ të Prokurorisë për dyshime të përfshirjes së kryebashkiakut të Durrësit, Vangjush Dako në vjedhje votash, tha se shumë shpejt zyrtarë të tjerë nga PS do të vihen në hetim, në sajë të një tjetër dosje me numrin ‘184’. Sipas Bashës, kjo dosje flet për një tjetër skandal të qeverisë, sipas tij, në Dibër.
“Ne do të vazhdojmë aksionin kundër këtij parlamenti ilegjitim, që është kapur në flagrancë, duke bashkëpunuar me krimin e organizuar. Rama, dosja 339 është makthi yt, ti e di fare mirë se përtej minutave që janë botuar, uroj ta dish se ça përmban edhe dosja 184. Këto do zbardhen, politikanët e përfshirë me kokat e krimit të organizuar do të shkojnë para drejtësisë. Pyeteni prokurorinë pse janë vonuar hetimet, dhe pse nuk zbardhen dosjet”, tha Basha.
