Në konferencën për media, Rama tha me ironi se kryedemokrati Basha është shalqi me provë, dhe i pangrënshëm. Kreu i qeverisë ka sulmuar rivalin e tij, kryedemokratin Basha pas propozimit për qeverinë të një platforme me 5 pika për rimëkëmbjen e ekonomisë.
Ai deklaroi se shkuarja në ekstrem me propozime të ashtuquajtura platforma alternative, është shprehje e mungesës së seriozitetit. Kryeministri Rama pohoi se qeveria e tij nuk është në garë me opozitën, por është në betejë me veten dhe me kohën.
“Atë që ju quani kandidati për kryeministër, është shalqi me provë. Domethënë i pangrënshëm, se nuk është i ardhur nga hëna, po ka qenë në provë disa herë dhe natyrisht shkuarja në ekstrem me propozime të ashtuquajtura platforma alternative është shprehje e një mungese serioziteti.
E provuar dhe largqoftë të kishte ndodhur që flama e COVID-it ta kishte gjetur këtë vend me atë kandidatin dhe me klubin e opozitës së bashkuar në këtë vend. Të gjente spitalet që e gjetëm ne, shërbimet shëndetësore, kapacitetet profesionale kur na besuan shqiptarët.
Kujtoni atë kohë për të kuptuar që kjo nuk është një betejë mes nesh dhe aty, apo mes meje dhe shalqinit me provë që është në krye të opozitës. Eshtë betejë e jona me vetveten dhe kohën. Koha nuk pret. se shqiptarët kanë pritur shumë”, tha Rama.
