Ministri i Shtetit për Diasporën, Pandeli Majko njihet si një nga personat më kritikë ndaj vetë qeverisë. E teksa foli sot në seancën parlamentare, nuk ka ngurruar të shprehë një tjetër kritikë ndaj kryeministrit Rama.
Fillimisht Majko foli për standartin e dyfishtë të ndihmës ekonomike, së cilës tha se do i vinte fundi, ndërsa teksa kritikonte opozitën, përmendi edhe lobimin rus, një ndër akuzat më të mëdha që mazhorancë po bën së fundmi ndaj Bashës.
Por, duket se Majko ka një tjetër mendim lidhur me këtë çështje. Ai pranoi se PS e tepron, ndërsa këshillon të djathtët t’i pyesin ata në lidhje me rusët sepse kanë pak më shumë eksperiencë.
“Edhe ne ndonjëherë e teprojmë, për shembull me këtë punën e ndihmës ruse apo sponsorizimeve ruse për PD-në. Të jemi të sinqertë. Nuk jam dakord me kolegun Balla me thënë të drejtën në disa drejtime.
Tani partia jonë nga viti ’49-’61-shin, partia e vjetër është fjala, e kemi pasur nji… (salla qesh, dëgjohen reagime). Ta dëgjojmë, më dëgjoni më dëgjoni…
Zoti Mima, se ju më kuptoni më mirë se këta tjerët, nga 49-a- deri në ’61-shin edhe partia e vjetër e majtë ka pasur një afeksion po e ka pasur për ideologji, jo për para. Kjo partia ime e vjetër… Na duket shumë interesant eksperimenti juaj që merrni para për të bërë lobizëm në Amerikë, shumë interesante është. Por unë kam një këshillë. Mendoj që kur vjen fjala për tek rusët mirë është të konsultoheni me ne, se ne me thënë të drejtën kemi pak eksperiencë në këtë punë. E mbyllëm këtë punë në 60-ën, bile e bëmë edhe një film. Por kam frikë se ju do e mbyllni me naj këngë të tipit “lule ti, lule unë, dil këtej se kam pak punë”, përfundoi Majko. TIRANA TODAY
