Kryetari i Partisë Demokratike, Lulzim Basha, po zhvillon një bashkëbisedim me gazetarët në selinë blu. Ai ka deklaruar se ka dy të afërt të infektuar me Covid që janë të shtruar, një te Spitali Infektiv dhe një te Senatoriumi.
“Është e pafalshme që dikush të rezultojë me Covid dhe çfarë mund të bëhet. Është mungesa e testimeve që ka sjellë këtë shpërhapje jashtë kontrollit. Se kam shifrat këtu. Ju e dini fare mirë se këto janë shifrat reale. Unë kam dy të shtruar, një te Infektivi dhe një te Senatoriumi, anëtarë të afërt të familjes.
Sot ka ndërruar jetë njeri shumë i afërt i një bashkëpunëtori dhe ka ndërruar jetë pas 4 ditësh”, tha Basha.
Kreu i PD-së e vuri theksin te vonesa e përgjigjes së tamponit, që sipas tij, në disa raste mund të vonojë deri në dy javë.
“Nuk mund të fshihet as kryeministri, as qeveria. Këto s’janë detyrat tona. Këto, qeveria kishte mundësi t’i bënte dhe ka mundësi t’i bëjnë. Unë ato që kam thënë në mars, do i kisha bërë. Vetë nuk jam ekspert, por prandaj i kam ekspertët”, tha Basha.
