Kryedemokrati Basha i ka kërkuar ndihmë Organizatës Botërore të Shëndetësisë. Në një letër drejtuar sot drejtorit të Zyrës së OBSH-së në Tiranë, Dr. Raul Gonzalez, kreu i opozitës kërkon mbështetje për pajisjen e autoriteteve shqiptare me pajisje për testimin më të madh të qytetarëve.
Në kohën kur Shqipëria po përjeton ditë të vështira në luftën për të parandaluar përhapjen e koronavirusit, Basha shprehet se vetëm duke shtuar numrin e testimeve dhe duke verifikuar në kohë çdo person të dyshuar si të prekur nga virusi, do arrijmë të frenojmë përhapjen e virusit.
“Duke qenë të ndërgjegjshëm për mundësitë e pakta që kanë autoritetet tona për ta përballuar të vetëm këtë situatë, si dhe duke shfrytëzuar këtë mundësi komunikimi, dëshiroj t’ju kërkoj që të ndihmoni autoritetet shqiptare dhe Shqipërinë me sa mundeni, për marrjen e sa më shumë pajisjeve testuese, të kiteve testuese dhe të tjerave materiale testuese.
Vetëm duke shtuar numrin e testimeve dhe duke verifikuar në kohë çdo person të dyshuar si të prekur nga virusi, ne arrijmë të izolojmë personin në kohë dhe të frenojmë përhapjen e virusit në numër më të lartë qytetarësh”, shkruan Basha në letrën për OBSH.
Në letrën drejtuar Zyrës së OBSH-së në Tiranë, kreu i PD-së, Lulzim Basha ngre edhe shqetësimin e ekspozimit të stafeve mjekësore ndaj infektimit.
“Do të ishim shumë mirënjohës, nëse do të ndihmonit në sigurimin e një sasie të konsiderueshme veshjesh dhe pajisjeve mbrojtëse të tjera të domosdoshme për të mbrojtur stafet tona mjekësore”, shkruan lideri i opozitës Basha.
