Kryetari i Partisë Demokratike, Lulzim Basha ka reaguar pas deklaratës së dy partive kryesore në Gjermani, (CDU/CSU), ku shprehën shqetësimin e tyre për krizën e brendshme politike në Shqipëri dhe për zgjedhjet lokale që do të zhvillohen pa opozitën.
Përmes një statusi në “Facebook”, Basha shkruan se i është mirënjohës Gjermanisë për vëmendjen e kushtuar ndaj problemeve që kanë penguar integrimin evropian, ndërsa shton se është i hapur ndaj angazhimit të Gjermanisë për zgjidhjen e krizës politike në Shqipëri.
“Mirënjohje Gjermanisë mike dhe mbështetëse të Shqipërisë, për vëmendjen dhe shqetësimin ndaj problemeve që kanë penguar integrimin evropian, si mungesa e zgjedhjeve të lira dhe të ndershme, lidhjet e politikës me krimin, mungesa e luftës ndaj krimit dhe korrupsionit.
Në emër të PD dhe të Opozitës së Bashkuar konfirmoj gatishmërinë tonë për zgjedhje të lira dhe të ndershme dhe mirëpres angazhimin e Gjermanisë mike për zgjidhjen e kësaj krize dhe hapjen e rrugës europiane të Shqipërisë”, shkruan Basha.
