Në kohën kur kreu i PD, Lulzim Basha, ka deklaruar se do ta kalojë natën në Teatrin Kombëtar, ka ardhur edhe një reagim nga kryeministri Edi Rama. I pyetur në emisionin ‘Opinion’, Rama tha se këto veprime nga ana e Bashës janë patetike.
“Unë besoj se kjo është një temë e ezauruar. Për mua është një temë që ka 20 vite dhe prej aq kohësh është i njohur edhe qëndrimi im. Besoj se ky është një atribut ekskluziv i pushtetit ekzekutiv dhe i Bashkisë. Kthimi i një teme me karakter urbanistik dhe zhvillimor, në një temë politike, tregon vetëm shterpësi dhe asgjë tjetër”, tha ai.
Rama shtoi se procesi për Teatrin Kombëtar po zhvillohet sipas ligjit. Sipas tij, lufta sot në Shqipëri është ajo për të mbrojtur shëndetin, dhe për të mbrojtur fazën e hapjes graduale.
“Vija e zjarrit sot në Shqipëri prej jo pak kohësh është në spital. Lufta sot në Shqipëri është ajo për të mbrojtur shëndetin dhe për të mbrojtur fazën e hapjes graduale. Një thirrje e tillë për të marrë në qafë njerëz, dhe për të bërë gjeste patetike, është papërgjegjshmëri”.
