Kreu i Partisë Demokratike, Lulzim Basha ka njoftuar në një deklaratë për shtyp vendimin unanim të grupit parlamentar për djegien e mandateve.
Ai renditi të gjitha arsyet që çuan në marrjen e këtij vendimi nga selia blu, ndërsa pritet që të ngrihet një grup pune për teknikalitetet si dhe të mblidhet Këshilli për të vendosur përfundimisht nëse do dorëzohen mandatet.
Gjatë fjalës së tij, Basha tha:
“Duke pasur parasysh gjendjen e emergjencës kombëtare ku ndodhet vendi për shkak të kapjes së kësaj qeveri në flagrancë duke vjedhur votat e qyt shqiptarë, për shkak të kapjes në afera flagrante korruptive dhe kriminale, eliminimit të parlamentit si një forum i demokracisë, kapje së së drejtësisë, paralizës së shtetit, shtypjes së të drejtave të njeriut që kanë shkaktuar një situatë të pa precedentë të krizës politike dhe gjendjes katastrofale të mjerimit sociale, duke mbështetur propozimet e opozitës, për një qeveri tranzitore, vendosi unanimisht djegien e mandateve parlamentare të PD-së në Kuvendin e dalë me votat e krimit e mafies në zgjedhjet parlamentare të qershorit 2017. Grupi i PD autorizoi kreun e PD –së të ndjekë hapat e mëtejshëm”.
