Pa zbardhur dita, IKMT e mbështetur nga forca të shumta të policisë, nisi aksionin për prishjen e banesave të “Unazës së Re”, e cila përfundoi me një bilanc negativ. Spitali i Traumës u kthye në një vend qëndrimi për 12 të lënduar. Më konkretisht, për 5 efektivë dhe 7 protestues.
Ish-deputeti Klevis Balliu, ka qenë një ndër personat që ka mbështetur banorët e zonës së “Astirit”. Teksa nga ana e PD-së shpesh trumbetohej me të madhe, madje duke qëndruar për orë e orë të tëra para protestuesve, sot duket se situata u ka dalë jashtë kontrollit.
Ndonëse operacioni ishte i njoftuar dhe IKMT-ja, kishte dërguar shkresat zyrtare, asnjë përfaqësues i PD-së nuk ishte aty. Aty nuk ndodhej as kryetarja e LSI-së, Monika Kryemadhi dhe as kryetari i PD-së, Lulzim Basha.
Teksa ish-deputeti demokrat, Klevis Balliu deklaronte në media se opozita ka qenë në krahun e banorëve të “Astirit”, Oriola Pampuri nga ana tjetër mori vëmendjen më shumë sesa përplasja e gjakosja e banorëve. Mjaftoi një intervistë, ku ajo tha se një nga protestuesit në “Astir” ndërroi jetë, dhe lajmi të merrte ‘dhenë’.
Pampuri dha edhe emrin e viktimës, dhe kërkoi që kryeministri Rama të mbante përgjegjësi. Por, Ministria e Shëndetësisë përgënjeshtroi lajmin e Pampurit.
Ndryshe nga Basha e Meta, të cilët për momentin s’kanë dhënë ende një qëndrim të tyre, është kreu i Shtetit, i cili ka dhënë apelin e radhës. Meta ka reaguar ashpër pas aksionit të IKMT, dhe policisë në zonën e “Unazës së Re”. Ai e cilësoi si të papranueshme dhunën ndaj banorëve që protestojnë për mbrojtjen e pronave të tyre.
Banorët e “Astirit” janë përballur që prej orës 6 të mëngjesit me forca të shumta policie, që kanë rrethuar zonën për të shembur banesat e tyre.
Dhjetra banorë janë shoqëruar me forcë në komisariat, ndërkohë disa prej tyre kanë përfunduar në spital.
Në një prononcim për mediat, banorët duket se janë dorëzuar. Ata shprehen se janë të zhgënjyer nga të gjithë, si nga qytetarët e Shqipërisë, ashtu edhe nga opozita.
