Sekretari i Përgjithshëm i PD-së Gazment Bardhi pas dëshmisë në Prokuori, ka dhënë shpjegime për gjithçka ka ndodhur brenda PD-së teksa mbështetësit e ish-kryeministrit Sali Berisha sulmonin selinë e PD. Ai tha se falë masave, ish-kryeministri Berisha nuk arriti ta kthente selinë e partisë në arenë gjakderdhje. Sipas tij, asnjë person brenda selisë nuk ka sulmuar, por ka pasur vetëm akte vetëmbrojtjeje.
Numri dy i PD-së deklaroi se ka dhënë të gjithë shpjegimet e tij për atë që ka ndodhur atë ditë. Bardhi ritheksoi se ka kontaktuar shtatë herë policinë dhe ndërhyrja është bërë 40 minuta me vonesë.
“Policia e Shtetit është njoftuar në 12:47. Ka pasur një komunikim të vijueshëm. Kam njoftuar më shumë se 7 herë zyrtarët më të lartë të shtetit. Kam dhënë shpjegime të plota, kam rikonfirmuar se e vetmja lëndë rrethanore e gjendur në selinë qendrore ne PD kanë qenë fikset e zjarrit.
Gjithashtu ka pasur një listë dhe polica dhe Prokuroria e ka hartuar vetë ditën e ngjarjes. Siç jeni në dijeni, Prokuroria dhe polica kanë ardhur në seli dhe çdo person i është nënshtruar regjistrimit dhe kontrollit. Kam dhënë deklarime për çdo çështje që jam pyetur. Nuk ka pasur asnjë sulm nga brenda selisë.
Në dijeni time, asnjë prej personave nga sa kam ndjekur, nuk kanë asnjë precedent penal. Kam rikonfirmuar se çdo person që ka qenë brenda selisë së PD, i është nënshtruar kontrollit fizik dhe kqyrjes nga ana e Prokurorisë dhe ripohoj atë që Prokuroria pohoi se asnjë send i thënë si armë etj… nuk është gjetur në ambientet e brendshme të selisë.
Në akuzën e Berishës nuk ka asgjë serioze. Sa i përket dyerve metalike, kam konfirmuar se asnjë zyrë nuk i është ndryshuar dyert për ti bërë me dyer të blinduara. Ju keni parë se nuk ka pasur dyer apo xhama të blinduar. Kam pohuar se PD ka marrë masa për të shmangur konfliktin që po sajonte Berisha për demokratët. Falë atyre masave, Berisha nuk arriti ta kthente selinë e partisë në arenë gjakderdhje”.
