Ministrja e Infrastrukturës dhe Energjisë, Belinda Balluku, ka garantuar banorët që preken nga projekti i Unazës në zonën e Paskuqanit, se askush nuk do të ngelet pa strehim. Po kështu edhe për ata që kanë banesa të palegalizuara. Pas mbledhjes së Këshillit të Ministrave, Balluku tha për mediat:
“Kjo qeveri është ajo që ka ndërtuar mijëra banesa për të pasterhët nga tërmeti, s’do ndodhë që të ngelë askush në rrugë. Bëhet fjalë për 654 banesa, të cilët janë të legalizuara e do trajtohen sipas ligjit. Për të tjerët po punojmë për një instrument që do akomodojë familjet që preken nga projekti.
Projekte të tilla që janë në të mirë të publikut, nuk duhet të zhvillohen? Të gjithë e dinë që aty do kalonte Unaza, por kanë marrë riskun për të ndërtuar. Qeveria Rama do marrë masat e askush s’do mbetet pa banesë”.
Pak ditë më parë, banorët e Paskuqanit dolën në protestë, duke kërkuar që projekti i Unazës së madhe të ndryshojë dhe të spostohet në mënyrë që banesat e tyre të mos shemben. Shkak për devijimin e rrugës, sipas tyre, është bërë fabrika e tullave në këtë zonë, ndërsa kërkojnë që të devijojë projekti në mënyrë që shtëpitë e tyre të mos shemben për 2 metra. Banorët shprehen se nuk do të ndalin protestat, derisa të marrin një zgjidhje konkrete për problemin e tyre.
