Pas takimit të mbajtur me delegacionin e BE, kreu i Grupit Parlamentar të PS, Taulant Balla tha se zgjedhjet e përgjithshme në Shqipëri do të mbahen në qershor të vitit 2021, ndërsa ato vendore më 2023.
“Zgjedhjet në Shqipëri janë në qershor të 2021, ato të përgjithshme. Zgjedhjet vendore i bie të jenë në qershor të 2023. Nuk kemi diskutuar për këtë çështje”, tha Balla.
Numri dy i PS ka zbuluar ndër të tjera se ka diskutuar me delegacionin e BE, për nevojën e zgjedhjes së kryebashkiakëve në tre Bashkitë e vendit, Shkodër, Durrës dhe Vorë, pas largimit të kryebashkiakëve të 30 qershorit, të cilët u prekën ngë ligji i dekriminalizimit.
“Pjesë e këtij diskutimi ka qenë edhe fakti që Presidenti për tre Bashki, për të cilat mandati i kryebashkiakëve ka mbaruar, Shkodër, Durrës e Vorë, bazuar dhe në parashikimet e Kushtetutës, të përcaktojë brenda kohës së mundshme, sa i përket Durrësit dhe Vorës jemi në kushtet e emergjencës civile. Dhe sapo emergjenca të ketë përfunduar, Presidenti të ketë dekretuar datën për zgjedhje.
Venecia ka dhënë përgjigje shteruese lidhur me kushtetueshmërinë e 30 qershorit. 30 qershori është një datë kushtetuese, zgjedhjet janë po aq kushtetuese dhe të gjitha organet e dalë prej tyre janë ligjore dhe vijojnë punën e tyre për një mandat 4-vjecar, që përfundon më 2023. Qytetarët e Shkodrës, Durrësit e Vorës sa më shpejt të jetë e mundur t’iu japim të drejtën që përmes votës të kenë kryebashkiakun. Kryebashkiakja e Shkodrës është përtej mandatit 4-vjeçar”, deklaroi ai.
