Kreu i grupit parlamentar të PS-së, Taulant Balla paralajmëroi sot një reformë në përzgjedhjen e Këshillit drejtues të televizionit publik dhe në Autoritetin e Mediave Audiovizive.
Gjatë fjalës së tij në konferencën për mediat, Balla u shpreh se ka nisur puna për të depolitizuar bordin drejtues të RTSH-së. Sipas tij, RTSH është “një korporatë mediatike jo funksionale sot”.
“Prej dje, ku morëm vendimin final të Venecias zyrtarisht nisëm punën për një reformimin tërësor qoftë të Autoritetit të Mediave Audiovizive për të garantuar depolitizim, dhe një institucioni tjetër që është këshilli drejtuesi i RTSH, që në këto momente është në proces rinovimi të mandateve të anëtarëve të tij.
Të dyja bashkë duhen parë në këtë frymë për të larguar çdo lloj ndikimi politik, kompromise të ulëta politike që i kanë bërë këto borde aspak profesionale duke bllokuar edhe shndërrimin e RTSH në korporatë mediatike jo funksionale sot, por për ta bërë një korporatë mediatike në të ardhmen shumë të suksesshme e të pavarur nga politika, si dhe një autoritet të mediave audiovizive të njëjtë me standarde të vendeve anëtare të BE. Pyetja që mund të lindte si do jetë formula?
S’ka nevojë të shpikim të reja sa kohë të aplikuara për reformën në drejtësi kanë garantuar garë të hapur që buron nga vullneti individual e garancia për të shkuar drejt institucioneve të pavarura.
Unë jam këtu që ta konfirmoj angazhimin tonë për të shkuar në këtë drejtim e kam besim se dhe opozita parlamentare që ka pasur kritikat e veta përgjatë diskutimeve të këtij ligji të gjejmë dakortësitë për të realizuar gërmë për gërme rekomandimet e vyera të Venecias”, tha ai.
