Kryetari i Grupit Parlamentar të PS-së Taulant Balla, zhvilloi ditën e sotme një takim me disa banorë në Elbasan prej ku theksoi se Berisha-Meta e Basha-Kryemadhi s’heqin dot të drejtën e votës.
Po ashtu ai foli edhe për shfuqizimin e dekretit të zgjedhjeve nga Ilir Meta, duke pohuar se nuk kishte aspak dyshime se do të binte dekreti i Presidentit të Republikës.
“Sot është një ditë e rëndësishme në rrugën e 30 Qershorit. Ne nuk kishim asnjë dyshim që do të binte dekreti i Presidentit të Republikës. Presidenti të cilin e kam votuar edhe unë.
Dhe nëse do të ktheheshim përsëri në të njëjtin kontekst politik do të bënim përsëri të njëjtën gjë sepse nuk kishim mundësi aso kohe të zgjidhnim një president tjetër. Ky ishte i vetmi që rrinte me ne dhe i qante hallin atyre që ishin në çadër. Ata i la 3 muaj i mori në qafë, na u desh ne t’i nxirrnim nga çadra. Sot Kolegji Zgjedhor, i ka dhënë përgjigje përfundimtare kujtdo që mund të kishte ndonjë dilemë.
Shumica e shqiptarëve nuk kishin asnjë dilemë se përpjekja e Ilir Metës ishte një përpjekje për të penguar çdo qytetar shqiptar të shprehet me votë. E kemi fituar këtë të drejtë në vitin 1990 teksa shqiptarët fituan pluralizmin politik, fituan të drejtën e votës së lirë, ndryshuan më pas sistemin dhe me anë të Kushtetutës u përcaktua e drejta e çdo qytetari për të zgjedhur. Një ditë të bukur zgjohet Ilir Meta dhe tha; zgjedhjet anulohen. Po kush ta dha ty këtë të drejtë? Sovranit nuk mund t’i heqësh të drejtën e votës”.
