Kreu i Grupit Parlamentar të Partisë Socialiste, Taulant Balla në përfundim të seancës gjyqësore ku akuzohet për shpifje nga Shkëlzen Berisha, ka folur për zgjedhjet vendore të 30 qershorit.
Në një prononcim për mediat, Balla u shpreh se zhvillimi i zgjedhjeve është një moment i rëndësishëm për funksionimin e shtetit ligjor në vend, dhe një mundësi e artë edhe për PD dhe LSI, që të reflektojnë.
“Zgjedhjet e 30 qershorit janë një moment i rëndësishëm për funksionimin e shtetit ligjor në vend, institucionet dhe demokracia funksionon mbi bazën e rregullave. Ju them qartë që më 30 qershor fiton Shqipëria dhe shqiptarët, shteti institucional, demokracia, kushtetuta dhe pas 30 qershorit është mundësi e artë edhe për PD dhe atë që ka mbetur nga LSI, që të reflektojnë në dy drejtime: kush politikan punon kundër reformës në drejtësi e ka betejën të humbur dhe kush politikan punon kundër interesave të vendit dhe integrimit, e ka të humbur këtë betejë”, deklaroi Balla.
