Është përuruar ditën e sotme Qendra më e re Shëndetësore në Gostimë, Cërrik.
Pjesë e ceremonisë përuruese ishte edhe kreu i Grupit Parlamentar të PS, Taulant Balla bashkë me ministren e Shëndetësisë dhe Mbrojtjes Sociale, Ogerta Manastirliu.
Gjatë fjalës së tij, Balla u shpreh se përurimi i këtij institucioni ishte i domosdoshëm pasi i vjen në ndihmë një komuniteti të madh.
“Rikonstruksioni i Qendrës Shëndetësore të Gostimës ishte i domosdoshëm për shkak të kushteve, numrit të madh të banorëve, por edhe faktit që kjo qendër ndodhet në kryqëzim rrugësh dhe u shërben edhe kalimtarëve”, tha ai.
Nga ana tjetër, Manastirliu deklaroi se rehabilitimi i kësaj qendre shëndetësore do t’i shërbejë 13 mijë banorëve, teksa shtoi se ky ishte një premtim i mbajtur ndaj banorëve.
