Gjykata e Tiranës ka urdhëruar që Sekretari i Përgjithshëm i PD-së, Gazmend Bardhi të sillet me forcë në gjyqin e dosjes ‘Babale’, pasi ky i fundit kishte hezituar të paraqitej pas 2 kërkesave të dërguara.
Sa i përket prokurorit Besim Hajdarmataj, gjykata ka kërkuar vetëm rinjoftimin e tij për seancën tjetër. Nga ana tjetër, u kërkua nga Prokuroria e Krimeve të Rënda të vërë në dispozicion informacione për angazhimin e Hajdarmatajt, pasi ky i fundit nuk u paraqit në seancë me justifikimin se ishte i angazhuar në një gjyq, në këtë gjykatë.
Biznesmeni Ylli Rakipi, i cili gjithashtu nuk është paraqitur për arsye se ndodhej jashtë vendit, do të lajmërohet sërish për prezencën e tij në seancën e ardhshme.
I pranishëm në seancë ishte i pandehuri Fredi Alizoti. Kujtojmë se kjo dosje mori një bujë politike vitin e kaluar, ndërsa të pandehur kanë përfunduar edhe ish deputeti Ervin Salianji, gazetari Jetmir Olldashi dhe Albert Veliu, i ashtuquajtur me nofkën ‘Babale’.
