I ati i efektivit të FNSH-së, Xhuljo Prela, hedh dritë mbi një konflik të të ndjerit para dy vitesh. Sipas tij, për shkak të këtij problemi edhe ka kërkuar transferim në Shkodër. Pas vrasjes në orët e para të kësaj të shtune te efektivit Xhuljo Prela, 26-vjeç, të dhëna të reja janë hedhur në dritë.
Martin Prela, babai i Xhuljos tregon se i biri i ka thënë se para 2 vitesh ka pasur një përplasje me dikë në Lezhë. Nga kjo kërkoi transferim në Shkodër. Babai i Xhuljos dyshon se ka të bëjë ky konflikt, ndërsa i kërkon policisë që të zbardhë sa më shpejt ngjarjen.
“Lajmin e mora në 5 të mëngjesit nga nipi im. Më thanë ka bërë aksident, nuk ma treguan të vërtetën. Pastaj kur u afruam më thanë që e kanë vrarë. Me djalin hëngrëm darkë, ishte i qetë. U zgjua herët e iku në Rinas, mori një mikun e tij që vinte nga jashtë dhe e çoi në Shkodër. Kur u kthye për të ardhur në shtëpi, ndodhi ngjarja. Jam i tronditur. Nuk e di nga se ka ardhur. Nuk kemi konflikte dhe as gjak me njeri.
Djali ishte i fejuar. Ndoshta konfliktet janë të punës. Më ka thënë se para 2 vitesh ka pasur një përplasje me dikë në Lezhë, sepse djali ka zbatuar ligjin. Nga kjo kërkoi transferim në Shkodër. Mbase është ky konflikt, nuk e di. I bëj apel policisë ta zbardhë ngjarjen. Ta gjej kush ma vrau. Ai nuk ngjallet më, por është një lloj lehtësimi për mua”, shprehet babai i Xhuljo Prelës.
