Avokatët e Ylli Ndroqit pretendojnë se klientit të tyre i janë sekuestruar pasuri të fituara nga trashëgimia, apo me kredi bankare të vërtetuara me dokumentacion të rregullt ligjor.
Avokati Alban Qafa doli me një deklaratë para mediave ku saktësoi të dhënat për disa nga pasuritë e sekuestruara.
“Rezulton se një pjesë e pasurive të vëna nën sekuestro nuk janë në pronësi të z Ndroqi. Edhe ato që janë në pronësi të tij janë krejtësisht të krijuara me burime të ligjshme”
U sekuestrua toka e përfituar me ligjin 7501
“Për sa i përket aseteve të bllokuara janë bllokuar tre pasuri , tokë bujqësore, që babai i Ylli Ndroqi i ka përfituar me ligjin 7501. Dhe më pas me trashëgimi i kanë kaluar z Ylli Ndroqi. Si mund të bllokohet si e paligjshme një pasuri që ta ka dhënë vetë shteti, në bazë të ligjit nr 7501.”
U sekuestrua apartamenti i viteve 90′
“Është bllokuar një apartament te bashkëpronësi i z Ylli Ndroqi, i cili është përfituar në bazë të ligjit nr 7652 dt 23/12/1992 Për Privatizimin e Banesave Shtetërore” Për të cilin është firmosur në vitin 1993 një kontratë me Ndërmarrje Komunale Banesa, siç kane bërë në atë periudhë me ligjin e miratuar në parlamentin shqiptar me dhjetëra mijëra shqiptarë”
Blerja e TV Ora
“Për sa i përket blerjes së TV ORA sh.p.k nga z Ylli Ndroqi në vitin 2007. Ky televizion i është blere shtetases Ilda Prifti në atë kohë 18 vjeç, në 12.11.2007 me kontratën noteriale nr rep 13309 nr 2120 kol, në vlerën 25.000.000 (njëzet e pesë milionë lekë).
E gjithë vlera e blerjes së TV ORA sh.p.k prej 25.000.000 lekë është financuar në bazë të kontratës së kredisë bankare në Raiffeisen Bank.
Është sekuestruar një pasuri truall në Mullet, që edhe vetë vendimi i sekuestros e përmend që është kryer transaksioni me bankë nga të ardhura të përfituara nga shitja e një pasurie tjetër po me bankë.
Vetë prezenca e forcave dukshëm e ekzagjeruar me nënshkrimin RENEA me maska, kapuç me automatik dhe me mjete të blinduara që u vendosën për mbi 4 orë përballë gazetarëve, flet qartë se qëllimi është për të ndalur zërin e medias”/ Lapsi.al
