Presidenti i Parlamentit Evropian, David Sassoli, ka ndërruar jetë mëngjesin e së martës në moshën 65-vjeçare. Ish-gazetari italian dhe politikani i qendrës së majtë, ishte i sëmurë dhe kishte anuluar çdo takim zyrtar që prej 10 dhjetorit. Politika Evropiane është në zi. David Sassoli ka humbur jetën pas ‘luftës’ së tij gati një mujore në spitalin Avianos të Italisë.
“Presidenti i Parlamentit Evropian, David Sassoli, ndërroi jetë në orën 1:15 të mëngjesit të 11 janarit në spitalin në Aviano të Italisë, ku u shtrua në spital”, tha zëdhënësi i tij, Roberto Cuillo në Twitter.
Më 10 dhjetor, Sassoli u shtrua në spital në Itali, për shkak të komplikimeve të rënda të lidhura me një mosfunksionim të sistemit imunitar. Të gjitha ngjarjet në të cilat ishte planifikuar të merrte pjesë kreu i Parlamentit Evropian, janë anuluar. David Sassoli ishte president i Parlamentit Evropian prej 705 vendesh që nga viti 2019.
Në dhjetor, 65-vjeçari Sassoli, një ish-gazetar nga Partia Demokratike Italiane, njoftoi se nuk do të kandidojë për t’u rizgjedhur si kryetar i PE, në mënyrë që, shpjegoi ai, “të mos përçajë shumicën evropiane”.
Mandati i tij përfundoi në janar. Është hera e parë në historinë e Parlamentit Evropian, që një president në detyrë ka ndërruar jetë. Sipas rregullores së brendshme të Parlamentit Evropian, nënkryetari i parë duhet të veprojë si president deri në zgjedhjen e një pasuesi.
Kryeministri Edi Rama ka dërguar mesazh ngushëllimi për ndarjen nga jeta të Presidentit të Parlamentit Europian, David Sassoli. Kreu i qeverisë shkruan në rrjetet sociale se Sassoli ishte një italian krenar dhe një avokat i zjarrtë i Shqipërisë.
Postimi i Edi Ramës:
Çfarë trishtimi! Miku ynë i mirë, Presidenti i Parlamentit Europian, David Sassoli, një europian i paepur, një italian krenar, një avokat i zjarrtë i Shqipërisë, gazetar i shquar dhe më pas politikan i respektuar nga të gjithë, ndërroi jetë befasisht duke lënë pas një boshllëk të ndjeshëm tek kushdo pati nderin e kënaqësinë ta njihte…
Veliaj/Sassoli: Një adhurues i vërtetë i Shqipërisë dhe një mik i dashur!
Kryetari i Bashkisë së Tiranës, Erion Veliaj, shpreh ngushëllimet për ndarjen e parakohshme nga jeta të Presidentit të Parlamentit Evropian, David Sassoli.
“Iku shumë shpejt! Me trishtim të thellë dëgjova për largimin e hershëm të David Sassoli. Presidenti karizmatik i Parlamentit Europian, një evropian i pasionuar, një italian tipik, një adhurues i vërtetë i Shqipërisë, dhe një mik i dashur!
Trashëgimia e tij bujare do të mbetet! Addio amico mio!”, shkruan Veliaj.
Kujtojmë që gjatë vizitës së tij në Tiranë, kryetari Veliaj i dorëzoi z. Sassoli “Çelësin e Tiranës”.
