Pas vendimit të marrë nga kryeministri i ri i Kosovës, Avdullah Hoti, për shfuqizimin e reciprocitetit ndaj Serbisë, ka reaguar presidenti serb Aleksandër Vuçiç. Sipas tij, heqja e të gjitha pengesave tregtare mes Kosovës dhe Serbisë, mbetet një ide e mirë.
Reagimi i presidentit serb vjen pak kohë pasi Qeveria e Kosovës, votoi për heqjen e masave të reciprocitetit ndaj Serbisë, që ishin vendosur më 1 prill.
“(Presidenti i Kosovës, Hashim Thaçi) e bëri këtë sepse donte të thoshte ‘nuk më intereson BE-ja, më intereson vetëm SHBA-ja’. Ne nuk jemi në të njëjtin pozicion.
Ne mendojmë se (Kosova) është fëmija i tyre (SHBA-së). Nga ana tjetër, është një ide e mirë për të hequr të gjitha pengesat tregtare midis Prishtinës dhe Beogradit. Unë thjesht dua të theksoj se ne nuk jemi në të njëjtin pozicion”, tha Vuçiç gjatë një interviste dhënë sot për televizionin serb, Prva.
Qeveria e udhëhequr nga Avdullah Hoti, tha se shfuqizimi i vendimit për masat e reciprocitetit, është bërë për t’i hequr të gjitha pengesat për vazhdimin e dialogut.
