Familjarët e Edison Begaj kërkojnë lirimin e tij, pasi u arrestua gjatë kontrolleve në lokale nga forcat RENEA. Në një prononcim për mediat, djali i xhaxhait të tij është shprehur se arrestimi i Begajt është tendencioz dhe se ka lënë në rrugë dy fëmijë të mitur, pasi ai është i divorcuar nga bashkëshortja.
Sipas tij, Begaj nuk ka kryer asnjë krim, e ndërsa armën e mbante për vetëmbrojtje pasi atentatori i tij vijon të jetë i lirë. 41-vjeçari po qëndronte në lokal me miqtë e tij, në momentin që forcat RENEA dhe forcat operacionale ndërhyjnë duke i neutralizuar dhe shtrirë në tokë. Gjatë kontrollit iu gjet në çantën e tij një pistoletë dhe një krehër me 5 fishekë pa leje.
Atentati
41-vjeçari u plagos me katër plumba në hyrje të banesës së tij, në fshatin Kaninë. Autori, ende i paidentifikuar e ka pritur atë në këmbë afër banesës dhe më pas e qëlloi. Plumbat e kapën Begajn në pjesën e poshtme të trupit, ndërsa për ngjarjen pistat e hetimit janë ajo e prishjes së pazareve të drogës ose një konflikt i kohëve të fundit që mund të ketë pasur Begaj.
Ka qenë ora 23:20 e mbrëmjes së datës 29 maj, ku është shtënë me katër plumba ndaj Edison Begaj, i cili mbeti i plagosur. Ndërkohë që policia ende nuk ka rënë në gjurmët e autorit.
Në dëshminë e tij të parë, Begaj ka thënë para hetuesve se nuk e ka parë autorin, dhe nuk e di se kush mund të jetë, kjo edhe për shkak të errësirës në zonë. Autori ka qenë i fshehur mes ullishteve të Kaninës, duke pritur 41-vjeçarin.
Ai po qëndronte në këmbë dhe pasi ka qëlluar nga 3 metra largësi, është larguar nga vendi i ngjarjes. Pasi është larguar pak metra në këmbë, në gjysmë të rrugës e ka pritur një makinë dhe është larguar.
Begaj ka qenë i dënuar për drogë me 7 vite e 6 muaj burg në shkurt të 2008, ndërsa është bërë edhe subjekt i OFL-së në lidhje me pasurinë e tij.
