Shkodra u trondit sot nga një atentat me armë zjarri. Shefit të Policisë Bashkiake të Malësisë së Madhe, Mentor Hasanaj, i është ngritur pritë, në Dobraç të Shkodrës, pranë rrethrrotullimit të “5 heronjve”. Në makinë me 39-vjeçarin ishte edhe babai i tij Xhelal Hasanaj, 74 vjeç, i cili ka ngelur i plagosur, ndërsa bashkëshortja Vjollca Hasanaj, u ka shpëtuar plumbave.
Raportohet se pasditen e sotme, blutë e Shkodrës kanë gjetur motoçikletën më të cilën udhëtonte autori i atentatit.
Motoçikleta është gjetur vetëm disa metra nga vendi ku është kryer atentati, në rrugën e pompave të ujësjellësit, që të dërgon në zonën e Livadeve.
Policia ka arritur të bjerë në gjurmët e mjetit, pas kërkimeve me metoda të specializuara. Në lidhje me ngjarjen janë shoqëruar tre persona, të cilët dyshohet se kanë dijeni për ngjarjen e rëndë, e cila tronditi Shkodrën mesditën e së dielës.
