Gjykata e Tiranës ka liruar 26-vjeçaren Adiola Lakra, e cila u arrestua pas vrasjes së Hekuran Billës. Adiola Lakra, sipas hetuesve është karremi që çoi para autorëve të vrasjes Billën. Në momentin kur Billa u ekzekutua, ka qenë duke folur me 26-vjeçaren, ndërkohë që telefonata ka qenë e hapur edhe pas ekzekutimit të 40-vjeçarit. Ky fakt ka bërë që hetuesit të mbanin në vëzhgim 26-vjeçaren.
Hekuran Billa u ekzekutua më 11 qershor 2020 në zonën e “Komunës së Parisit”. Adiola Lakra do të takonte Hekuran Billën mbrëmjen që u krye atentati, gjë e cila është zbuluar përmes tabulateve telefonike.
E reja tashmë do të jetë nën masën e “detyrimit të paraqitjes”, ndërsa vendimi është marrë pasi nuk janë gjetur prova bindëse nga grupi hetimor për implikimin në vrasje.
