Gazetari dhe opinionisti i njohur nga Kosova, Gani Mehmetaj tregon se është sulmuar me armë në banesën e tij.
Përmes një postimi në Facebook, gazetari shpërndan fotot e dritares së thyer dhe plumbit. Ngjarja sipas tij ka ndodhur javën e kaluar, ndërsa bën me dije se policia ka marrë për të analizuar plumbin e gjetur në dhomën e tij.
Ish-kryeredaktor i “Bota Sot” tha se ka lajmëruar edhe ambasadën amerikane në lidhje me këtë ngjarje.
Postimi i plotë:
Paralajmërimin (kërcënues) e mora!
Miq e dashamirë. Javën e kaluar me gjuajtën me armë zjarri në shtëpinë time, në dhomën e fjetjes. Predha e theu qelqin e parë, por u ndal në parvazin e dritares, në pjesën e aluminit, që ia ndryshoi drejtimin.
Erdhi policia, erdhën edhe hetuesit, maten e çmatën dhe shkuan. E morën predhën e armës që ta analizojnë në laborator. Policia shikimin e bënë të shtunën, por që nga ajo ditë nuk u dukën më.
Paralajmërimin kërcënues e mora, por tekstet që u nuk i pëlqeu dikush nuk i tërheq dot, sepse i pushtuan portalet shqipe si asnjëherë më parë.
Përmes miqve e lajmërova Ambasadën amerikane. Miqtë tjerë më lajmëruan me telefon se e kanë takuar e lajmëruar edhe OSBE e institucionet e Kosovës.
