Kryetari i Partisë Bindja Demokratike, Astrit Patozi do të kandidojë në Tiranë për zgjedhjet parlamentare të 25 prillit.
Një ndër nga arsyet e marrjes së këtij vendimi, është fakti se Patozi ka zhvilluar aktivitetin politik në kryeqytet, si dhe pesha elektorale që zë ai vetë.
“Logjika e formimit tim më çon në Tiranë sepse kam lindur në Tiranë dhe kam zhvilluar aktivitetin tim politik këtu por edhe për peshë elektorale. Pasi ta diskutoj në parti do të marrim vendim, kjo na bën ndryshe nga partitë e tjera, sepse vendimet nuk i merr kryetari si të dojë”, tha Patozi në ”Top Talk’’.
Ndër të tjera, Patozi i konsideroi “gjellë e prishur”, të gjithë politikanët që kanë drejtuar vendin këto 30 vite.
Sipas tij, antidoti për këto parti që helmojnë shoqërinë janë partitë e reja, me një strukturë, ku drejtuesi është i barabartë me të gjithë kandidatët brenda partisë.
“E helmuar është qeveria e Ramës që sot ka e vetme timonin, por edhe dy partitë e lodhura në opozitë, edhe PD edhe LSI. Të treja i kanë provuar llojet e aleancave me njëra-tjetrën.Çfarë mund të presin më shqiptarët prej tyre”. Ne jemi e vetmja shpresë që Shqipëria mund të ndryshojë. Ne i drejtohemi kryesisht pjesës së paangazhuar të shoqërisë, e cila është e papërfaqësuar. Edhe dyshimet që mund të kenë ndaj nesh janë të mirëkuptuara. Ne jemi më afër tyre. Ata e kanë më të lehtë për të zgjedhur njërin prej nesh apo të gjithë ne nëse do të jemi në një koalicion, në mënyrë që t’i japim një goditje këtyre kryetarëve”, u shpreh Patozi.
