Kreu i PD-së, Sali Berisha, ka reaguar për takimin Vuciç dhe Kurti në Bruksel, ku nuk u arrit asnjë marrëveshje. Berisha vendosi pikat mbi “i” duke theksuar se dialogu mes palëve është i domosdoshëm për kapërcimin e krizës. Sipas tij, ndonëse nuk pati rezultate konkrete, takimi ishte pozitiv. Berisha u shpreh më tej se çështja e targave dhe letërnjoftimeve, siç e kërkon qeveria e Kosovës, është e parashikuar në marrëveshjet e mëparshme të arritura mes dy palëve në Bruksel.
“Në Bruksel ka pasur zhvillime të rëndësishme, takimi mes Kurtit dhe Vuçiç, ky takim, Stoltenberg përsëriti vendosmërinë e NATO-s për të garantuar stabilitetin e Kosovës, që është dhe për rajonin e më gjerë. Këtu morën një mesazh të fortë dhe të qartë.
Këtu morëm një mesazh të fortë dhe të qartë, për ata që punojnë për projektin e Putinit në Ballkan, Vuçic dhe sivllau i tij. Po kështu sekretari i përgjithshëm i kërkoi që të zgjidhin të gjitha çështjet me dialog, si një qëndrim që kontribuon në mënyrë paqësore për paqe.
Të nesërmen e takimit me sekretarin e përgjithshëm, Vuçiç dhe Kurti, zhvilluan takime me përfaqësuesin e lartë, Borrell. Mund të themi se edhe ky takim, ndonëse nuk pati rezultate konkrete, ishte pozitiv. Çështja e targave dhe letërnjoftimeve, siç e kërkon qeveria e Kosovës, është e parashikuar në marrëveshjet e mëparshme të arritura mes dy palëve në Bruksel. Dialogu mes palëve i domosdoshëm, për kapërcimin e krizës”, tha Berisha.
Kryediplomati i BE-së, Joseph Borrell, doli dje në një konferencë të shkurtër për shtyp, nga ku njoftoi se nuk ka pasur asnjë marrëveshje mes palëve. Borrell tha se palët ranë dakord që procesi të vijojë më tej, në ditët e para të shtatorit. Ai theksoi se palët duhet të jenë këmbëngulëse, dhe të gjejnë një zgjidhje për situatën aktuale.
