Viktor Marku dhe Sebastian Mali, të cilët akuzoheshin për vrasjen e Hekuran Billës, janë liruar nga qelia. Me vendim të Gjykatës, nga ‘arrest me burg’ ata kanë kaluar në ‘arrest shtëpie’. Shkak për këtë është bërë ndryshimi i afateve të paraburgimit. 34-vjeçari Marku akuzohej si personi që ekzekutoi Billën, ndërsa nipi i tij, Sebastian Mali, dyshohej se kishte ndjekur lëvizjet e viktimës.
40-vjeçari Hekuran Billa dyshohet se u vra për shkak të hakmarrjes, pasi në 2006 vrau në Angli Prelë Markun, vëllain e Viktor Markut. Që në fillim kur u arrestuan, të akuzuarit e kishin mohuar krimin.
Hekuran Billa u ekzekutua mbrëmjen e 12 qershorit në zonën e ‘Komunës së Parisit’, teksa ishte në Fuoristradën e tij. Nga kjo ngjarje, ende s’ka asnjë autor të dënuar.
Mali e Marku u prangosën pas dyshimeve se e nxorën në pritë Billën me një vajzë, e cila po ashtu u arrestua e më pas u lirua. Adjola Lakra shoqërohej me Billën, pas njohjeve në rrjetet sociale. Kjo e fundit ishte infiltruar nga hasmi për ta nxjerrë biznesmenin në pritë.
Fillimisht në dëshminë e saj ajo u shpreh se ishte paguar nga Viktor Marku, për ti qendruar pranë Billës, por më pas përpara prokurorëve ka mohuar përfshirjen e saj në këtë vrasje.
