Pas izolimit me orare, Kosova nuk është ndalur me kaq, por ka vijuar me thellimin e masave. Sipas njoftimit zyrtar, bëhet me dije se Ministria e Infrastrukturës ka vendosur që transporti publik do të ndërpritet deri ditën e hënë, 9 nëntor në orën 05:00. Në të njëjtën kohë, Ministria ka kërkuar mirëkuptim nga operatorët.
“Të nderuar operatorë të transportit publik të udhëtarëve. Ju njoftojmë se Qeveria e Republikës së Kosovës, me vendimin 01/41 të datës 06.11.2020, në pikën 2 të këtij vendimi ka pezulluar disa paragrafë, ndër to paragrafin 14 të vendimit 01/39 të datës 01.11.2020, me ç’rast pezullohet transporti publik i udhëtarëve deri të hënën më 09.11.2020 në ora 05:00. Lusim operatorët të kenë mirëkuptim dhe të respektojnë vendimin e Qeverisë”, thuhet në njoftim.
Qeveria në mbledhjen e radhës mori vendimin që të ndalohet veprimtaria e të gjitha bizneseve, qendrave tregtare, supermarketeve dhe subjekteve që ofrojnë shërbime të gastronomisë prej dje në orën 20:00, deri të hënën në orën 5 të mëngjesit.
