Mëngjesin e sotëm iu bë për herë të tretë atentat Ardjan Çapjas.
55-vjeçari mori një plumb në shpatullën e majtë, ndërsa aktualisht ndodhet në Spitalin e Traumës, ku iu nënshtrua një operacioni.
Gazetari Artan Hoxha në studion e “ABC News” tregoi se ka diçka që e bën fisin Çapja, të fuqishëm.
Sipas tij, ata janë një fuqi ekonomike dhe kanë burime njerëzore që korruptojnë shtetin.
“Çapjat kanë treguar në të kaluarën se kanë ekzekutuar të gjithë grupin që i kanë vrarë vëllain. Gentian dhe Nezir Beqiri janë ekzekutuar ndërsa ishin në arrest shtëpiak dhe ruheshin me dy policë tek dera.
Është fuqi ekonomike, burimet njerëzore që korruptojnë shtetin… kjo i bën ata të fuqishëm. Kam nxjerrë me fakte që Çapjat ishin me kryeministrin. Zgjedhjet në Elbasan i kam ndjekur kohët e fundit, të gjitha degëzimet në Shqipëri të çojnë në Elbasan.
OFL që nisi në 3 Mars, në ditën e dytë të punës dërgoi formularin Çapjas që nuk është i dënuar për asgjë.
Ajo që po ndodh në Elbasan është thjesht një kronikë e paralajmëruar prej kohësh, është seri e radhës që për sa kohë nuk do të ndërhyhet seriozisht, konflikti do të vazhdojë me eliminime të tjera.
Konflikti i madh që kanë sot i cili është problem edhe për hetimin është se Çapjat nuk kanë vetëm 1 konflikt, por kanë disa.
Për sa kohë ndiqen këshillat e udhëheqësit që thotë kokat hëngshin, kjo do të vazhdojë.
Çelat nuk kanë fis, nuk janë si Çapjat. Elbasani është një nyje strategjike për krimin, prokurorët dhe drejtorët e policisë e ndjejnë këtë.
Aty është një qytet ku qytetarët shohin hallin e tyre, dhe kemi këto grupe që vazhdojnë punën e tyre. Kohët e fundit kam nxjerrë një foto të kryeministrit me Çapjat”, u shpreh Hoxha.
