Mediat greke bëjnë me dije se Shqipëria dhe Greqia kanë arritur një marrëveshje, për punësimin sezonal të shtetasve shqiptarë në sektorin e bujqësisë, në vendin fqinj.
Bëhet me dije se nga kjo marrëveshje do të përfitojnë rreth 10 mijë shtetas shqiptarë. Siç thonë mediat fqinje, marrëveshja u arrit falë këmbënguljes së ministrit grek, Makis Voridhis, dhe deputetit, Taulant Balla.
Ky ndryshim ligjor mësohet të ketë kaluar në Parlament, mbrëmë në orën 01:45 të natës. Kjo marrëveshje parashikon punësimin sezonal me procedura të përshpejtuara të 7 deri në 10 mijë shtetasve shqiptare. Këta të fundit do të punësohen me të drejta të plota në Greqi.
Duke filluar që nga dita e hënë, më datë 4 maj e deri në 20 qershor, të gjithë punëdhënësit grekë që janë të interesuar për të punësuarit sezonal, do të kenë mundësi të aplikojnë pranë kooperativave bujqësore të rajoneve të tyre.
Ndërsa punonjësit e interesuar do të duhet të aplikojnë në platformën online ‘www.punenegreqi.gr’ dhe brenda 3-4 ditëve, do të kenë përfunduar kontratat e punës prej punëdhënësve.
Për herë të parë procesi i pajisjes me dokumentet e nevojshme do të jetë falas dhe nuk do të jetë e nevojshme pajisja me vizë pune.
