Mbi 25 mijë viktima nga koronavirusi, bilanci i Spanjës për 24 orët e fundit

Situata nga koronavirusi në Spanjë duket të jetë qetësuar ndjeshëm, por prapë shifrat e mbeten ndër më të lartat në kontinentin e Evropës.

Në 24 orët e fundit në Spanjë kanë humbur jetën 276 persona, 5 më pak se ditën e djeshme ku u regjistruan 281 viktima.

Kështu shkon në 25,100 numri i personave që kanë humbur jetën nga virusi COVID-19 në Spanjë. Ndërkohë janë shtuar edhe 2,579 raste të reja infektimi, një ulje e ndjeshme në krahasim me dje ku u regjistruan 3,648 raste të reja.

Që nga shpërthimi i pandemisë, në Spanjë janë konfirmuar më shumë se 245 mijë raste të njerëzve të infektuar.

Mbi 146 mijë spanjollë kanë arritur ta mposhtin koronavirusin, ndërsa 74,234 raste janë ende aktive. Prej këtyre, 2.386 pacientë ndodhen në gjendje të rëndë shëndetësore.

Spanja renditet e dyta për numrin më të madh të personave të infektuar nga COVID-19, pas SHBA-ve që regjistrojnë mbi 1,1 milionë raste.

Ndërkohë sa i përket numrit më të madh të viktimave të shënuara, Spanja tashmë renditet e katërta në botë pas SHBA-ve (65,960), Italisë (28,236) dhe Mbretërisë së Bashkuar (27,510).

Më shumë se 3,4 milionë njerëz nga e gjithë bota janë prekur nga virusi vdekjeprurës, ndërsa mbi 240 mijë persona kanë humbur jetën.

Sipas Worldometer, rreth 2,1 milionë raste infektimi nga e gjithë bota janë ende aktive.