Kapet në Dubai, i shumëkërkuari Plaurent Dervishaj, i njohur si një prej anëtarëve të bandës së Durrësit.
Dervishaj u shpall në kërkim nga Prokuroria e Posaçme gjithashtu e njohur si SPAK, për vrasjen e Vajdin Lames dhe Klodian Saliut, në kuadër të operacionit “Asgjë nuk harrohet” por edhe për disa ngjarje të tjera kriminale në vend, ku dyshohet se bën pjesë.
Prangosja e Dervishajt ka lidhje edhe me atentatin ndaj prokurorit Arjan Ndoja, një vit më parë në mbikalimin e Shkozetit. Mësohet se i prangosuri si i dyshuar kryesor për ngjarjen, Redjan Rraja është filmuar teksa takonte Dervishajn pak kohë para atentatit.
Ndalimi i Dervishaj mendohet se është kryer nga Policia e Dubait pas udhër-arrestit ndërkombëtar që SPAK ka lëshuar për Dervishajn. Ndërkohë, organi hetues ende nuk ka bërë të ditur asgjë lidhur me operacionin e zhvilluar jashtë vendit lidhur me arrestimin e bujshëm të të shumëkërkuarit.
