Fjolla Morina ka rënë në prangat e policisë. Janë mediat në Kosovë të cilët përcjellin lajmin se këngëtarja është arrestuar në një lokal në lagjen Emshir të Prishtinës.
Fjolla Morina ishte shpallur në kërkim ndërkombëtar nga Interpoli, pasi mbi të rëndon akuza për “trafikim të armëve dhe municionit” në Shqipëri. Kjo vjen si pasojë e arrestimit të saj vitin e kaluar në pikën kufitare Kosovë-Shqipëri, ku u kap me dy pistoleta në makinën e saj, shoqëruar nga dy persona të tjerë.
Morina u mbajt në “arrest shtëpiak” në Kukës për një muaj, ndërkohë vetëm në prill të këtij viti Prokuroria pranë Gjykatës së Shkallës së Parë në Kukës, ka depozituar vendimin për shpalljen në kërkim ndërkombëtar.
Ajo u dënua në 25 mars nga Gjykata e Kukësit me 9 vite burg, që pas zbritjes së 1/3 prej gjykimit të shkurtuar u bën 6 vite.
Ndonëse në kërkim, ajo sfidoi hapur policinë duke bërë pushime luksoze e madje duke ndarë me ndjekësit foto të ndryshme. Më herët ajo shijoi pushimet në Dubai me partnerin e saj Fisnik Sylën, me të cilin gjithashtu u kurorëzua me martesë po atje, pas një propozimi romantik.
Në 5 korrik, Fjolla Morina shoqëronte të bijën në mbrëmjen e maturës.
