Pas protestës së opozitës dhe përplasjeve të dhunshme me policinë, deri më tani janë arrestuar 50 persona, dhe 40 të tjerë po ndiqen në gjendje të lirë. Mes të arrestuarve ka qenë edhe sekretari Organizativ i PD, Sait Dollapi, i cili disa orë më vonë u la i lirë nga policia.
Uniformat blu kanë kryer operacione për arrestimet e tyre gjatë gjithë natës, ndërsa vijon analizimi i pamjeve të kamerave të sigurisë të vendosura para Kryeministrisë e Parlamentit.
Nga ora 18:30, deri në orët e para të mëngjesit, Tirana i ngjante një fushë beteje, ku përplasjet mes protestuesve dhe policisë ishin të ashpra. Bomba molotov, kapsolla, gaz lotsjellës ishin vetëm disa nga mjetet që u përdorën nga protestuesit dhe policia.
Gjithçka nisi te Kryeministria, aty ku përplasjet e shpeshta bënë që të çahej kordoni i policisë disa herë. Dera e Kryeministrisë ishte gjithë kohës në flakë. Protestuesit kanë qëndruar rreth 3 orë te Kryeministria, dhe më pas u zhvendosën te Parlamenti. Këtu përplasjet ishin akoma dhe më të egra.
Sot në orën 11:00 opozita ka paralajmëruar një tjetër protestë. Lajmi u bë i ditur mbrëmjen e djeshme nga kreu i demokratëve, Lulzim Basha, menjëherë pas mbledhjes së opozitës mbajtur në orën 00:15.
Po kështu, opozita do të kthehet sërish me protestë kombëtare ditën e hënë, në të njëjtin orar, 18:30, që do të jetë edhe protesta e pestë kombëtare në total.
