Kreu i Policisë së Shtetit, Ardi Veliu, ka thirrur mëngjesin e sotëm në një takim zëvendësdrejtorët e policisë dhe shefat e komisariateve.
Pas ndryshimeve të bëra tek drejtuesit e 10 qarqeve në vend, tani pritet që ndryshimet të prekin sipas hierarkisë dhe shefat e komisariateve dhe nëndrejtorët e policisë në rrethe.
Kjo mbledhje, vjen një ditë pasi kryeministri Edi Rama e akuzoi Policinë e Shtetit si të korruptuar. Gjatë një takimi me përfaqësuesit e Policisë së Shtetit, kryeministri Rama paralajmëroi se do të ketë lëvizje në të gjithë piramidën e uniformave blu, deri në nivel komisariatesh.
Ai e cilësoi si të pajustifikueshme rastet e shtuara të marrjes së ryshfeteve dhe korrupsionit në radhët e uniformave blu.
Sipas kreut të qeverisë, një pjesë e tyre duhet që të largohen nga policia dhe të dërgohen përpara drejtësisë.
