Zv.ministrja e Brendshme, Romina Kuko ka folur rreth proceseve që do të ndiqen për pranimin e aplikantëve të rinj, në Policinë e Shtetit.
E ftuar në rubrikën Opinion në News 24, Kuko deklaroi se aplikimet për t’u bërë pjesë e forcave policore janë hapur që në fillim të muajit Korrik dhe do të zgjasin deri në fillim të muajit Gusht. Kandidatët do të kalojnë në disa filtra dhe se sipas ministres, të gjitha dosjet do të shqyrtohen për të parë nëse ata i përmbushin kriteret bazë apo jo.
Aplikantët që do të përzgjidhen do t’i nënshtrohen testit me shkrim, pyetjet e së cilit do të bëhen edhe me praninë e ndërkombëtarëve, për të vijuar më tej me intervistat e deri te testi fizik.
“Pas aplikimit do ketë shqyrtim të dosjeve, për të parë nëse aplikantët përmbushin kriteret bazë. Pastaj është testi me shkrim, ku pyetjet do bëhen me praninë e ndërkombëtarëve, një intervistë me të gjithë kandidatët dhe një filtër psikologjik të kandidatëve dhe në fund është testi fizik. Për testin fizik kriter është gjatësia, te meshkujt 1.75 e lart dhe për vajzat 1.65 m”, tha zv.ministrja.
