Ai është blerja më e mirë që Napoli ka bërë në vitet e fundit, trajneri Carlo Ancelotti. pas një largimi rreth 9 vite nga Italia, ai rikthehet dhe me objektiva të qarta, të shpallet kampion. Dhe këtë kërkon ta bëjë me klubin e Napolit, i cili ka ndryshuar shumë pak nga viti i shkëlqyer që mbyllën, por tani me idetë e Don Carlo mund të shkojë edhe më larg se vendi i dytë.
“Shpresoj ta çoj Napoli në vendin e parë. Kjo është një skuadër shumë cilësore, nuk ka fituar titullin, por i ka shkruar shumë pranë. Shpresoj që aftësitë e mia ta ndihmojnë në këtë objektiv,” – tha trajneri për “Dazn”. “Erdha te Napoli sepse mbi të gjitha doja të kthehesha në Itali dhe të flisja gjuhën time, pastaj më bindi projekti i klubit,” – pohoi Ancelotti.
Pasi morën një fitore me përmbysje përballë Lazios, këtë javë Napoli ka sërish një ndeshje të vështirë, ku përballë do të ketë Milanin. Një përballje ndjenjash, pasi Ancelotti ka veshur ngjyrat kuqezi dhe e ka drejtuar para shumë vitesh, por aty do të gjejë edhe Gattuson që ka qenë edhe lojtari i tij tek Milani.
“Për sa i përket karakterit, Rino është ai që ka qenë gjithmonë. Këtë e kupton nga mënyra si luan ekipi: i kujdesshëm, i organizuar mirë, kompakt dhe agresiv, ashtu si ishte Gattuso futbollist. A e imagjinoja se do të bëhej trajneri? Në disa aspekte jo, në të tjera po, si ai i pasionit dhe Gennaro me pasion ka ndërtuar një karrierë të madhe si lojtar.”
