Zbardhen detajet e ligjit për përfituesit e amnistisë për këtë vit. Viti 2016 ishte viti i fundit i përfituesve të amnistisë, ndërsa për këtë vit, pak kohë më parë ministrja e Drejtësisë, Etilda Gjonaj bëri me dije se nga kjo amnisti pritet të përfitojnë rreth 50 për qind e grave të dënuara dhe të miturve, që shënon përqindjen më të lartë të viteve të fundit për përfituesit e kësaj kategorie. Por gazeta ka mësuar më shumë detaje se kush janë kategoritë e të burgosurve që do të përfitojnë jo vetëm liri, por edhe ulje të dënimit.
Sipas vendimit të Ministrisë së Drejtësisë, këtë vit do të përfitojnë të gjithë ata meshkuj që janë të dënuar me 2 vite burg të formës së prerë deri në fund të muajit shtator të këtij viti. Po ashtu, një tjetër kategori janë edhe femrat dhe të miturit, të cilët janë të dënuar me 3 vite burgim të formës së prerë. Por këtë vit nuk do të përfitojnë nga amnistia vetëm të dënuarit me burgim, por edhe ata që janë të dënuar me shërbim prove.
“Nga amnistia e këtij viti pritet të përfitojnë të gjithë ata meshkuj të dënuar me 2 vite burgim me vendim të formës së prerë deri në 30/9/2019, si dhe femrat dhe të miturit, të cilët janë dënuar me tre vite burgim. Risia e amnistisë të këtij viti është edhe fakti i përfshirjes së të dënuarve me shërbim prove”, thuhet në ligjin e Ministrisë së Drejtësisë. Por pjesë e përfitimit të amnistisë këtë vit pritet të jenë edhe personat femra të dënuara që janë mbi 50 vjeç, si dhe personat meshkuj që janë mbi 60 vjeç.
Ja kategoritë që nuk përfitojnë
Por përveç kategorisë së të burgosurve që përfitojnë liri, ka dhe nga ata që nuk përfitojnë nga amnistia e këtij viti. Në këtë kategori bëjnë pjesë personat të cilët janë të dënuar me burgim të përjetshëm. Po ashtu, një tjetër kategori që nuk përfitojnë janë edhe ata që janë dënuar nga gjykata për dhunë në familje, krime seksuale apo korrupsion.
Në draft parashikohet gjithashtu se nuk përfitojnë as të dënuarit për krime zgjedhore, si dhe ata që kanë kryer vepra të rënda penale. Një tjetër kategori që nuk përfitojnë amnisti janë edhe ata persona që janë dënuar nga gjykata me vendim të formës së prerë për të njëjtën vepër penale, duke vijuar më tej edhe me ata persona të cilët i janë shmangur ndjekjes penale apo procesit hetimor. Për femrat dhe të miturit ka edhe një përjashtim tjetër. Në pikën 8, të nenit 3 thuhet se femrave dhe të miturve, që nuk përfshihen tek kategoritë përfituese, u zbriten 1/4 e dënimit të mbetur, pavarësisht kritereve ndalues. Përjashtohen vetëm ata që janë përsëritës të së njëjtës vepër penale.
“Nuk përfitojnë nga ky nen personat, që i janë shmangur ndjekjes penale apo procesit hetimor të kryer nga organi procedues deri në datën 30.09.2019 ose personat përsëritës të së njëjtës vepër penale. Nuk përfitojnë nga ky nen të gjithë personat, të cilët mbajnë apo kanë mbajtur një funksion publik dhe janë subjekt i ligjit “Për garantimin e integritetit të personave që zgjidhen, emërohen ose ushtrojnë funksione publike”, të ndryshuar, si dhe personat funksionarë publikë, që janë në ndjekje penale në hetime paraprake ose në proces shqyrtimi gjyqësore në çdo fazë apo nivel gjykimi”, thuhet në draftin e Ministrisë së Drejtësisë. Sipas juristëve edhe vitin që kaloi ishte parashikuar për amnisti, por ajo dështoi për një sërë arsyesh, mes të cilave edhe shkaqe politike. Në vitin 2016 nga amnistia përfituan rreth 700 të burgosur. I njëjti numër përfituesish pritet të jetë edhe këtë vit. Në total numri i të dënuarve dhe atyre që qëndrojnë në paraburgim, arrin në 5 mijë. Ky draft pritet që të miratohet nga qeveria brenda këtij viti, duke u dhënë mundësinë shumë të dënuarve që të kalojnë festat e fundvitit me të afërmit e tyre. /Gazeta SOT
