Amerikanët e kanë vënë në monitorim të rreptë ish-liderin demokrat Sali Berisha, pasi ai u shpall “non grata”. Dje në Kuvend u votua shtyrja e mandatit për organet e Vettingut, ku ra në sy fakti se PD e PS bashkuan votat, ndërkohë që Berisha dhe mbështetësit e tij deklaruan publikisht votën kundër.
Sali Berisha deklaroi votën kundër zgjatjes së mandatit të Vettingut. I pyetur nga gazetarët para futjes në Kuvend, Berisha theksoi se pengu dhe pengmarrësi janë në bashkëqeverisje, duke iu referuar kreut të PD-së dhe kryeministrit Edi Rama. Ndërkohë procesin e Vettingut, ish-kryeministri e cilësoi si gjah shtrigash i përdorur me disa standarde, dhe tha se kurrë nuk do ta votojë një proces që nuk e besojnë më qytetarët shqiptarë.
“Është bashkëqeverisja e pengut me pengmarrësin. Unë i kam shprehur të gjithë qëndrimet e mia ndaj këtij procesi gjigant korruptiv, që shoqërohet në çdo hap me shkelje të rënda ligjore të konstatuara dhe u përdor për gjah shtrigash nga Edi Rama me ndihmën e mikut të tij Soros. U përdorën disa standarde dhe ky është një proces i flakur që nuk i beson më shoqëria shqiptare. Unë kurrë nuk do të votoj kundër atyre që besojnë shqiptarët”, deklaroi ai.
Sulmet e Berishës në adresë të Reformës në Drejtësi dhe rëndësia që kishte miratimi i zgjatjes së mandatit të organeve të Vettingut, kanë bërë që në Kuvend dje të zbarkojnë amerikanët.
Disa përfaqësues të Ambasadës së SHBA në Tiranë, të shoqëruara nga përkthyesja, janë parë në lozhat e Parlamentit, ndërsa kanë parë nga afër votimin e deputetëve për zgjatjen e mandatit të Vettingut.
Gjatë qëndrimit në lozhën e Kuvendit të Shqipërisë, dhe në një kohë që ish-kryeministri Sali Berisha ishte duke folur në Parlament e sulmonte Reformën në Drejtësi, shihej që përfaqësuesve të Ambasadës së Shteteve të Bashkuara të Amerikës, iu përkthehej fjala nga përkthyesja.
